വെള്ളിയാഴ്ച്ച ദിവസം. ചൂടു കാരണം കൂടെയുള്ള ആര്ക്കും ഉച്ചയ്ക്ക് ഹോട്ടലില് പോകാന് വയ്യ . എന്നാല് പിന്നെ വല്ലോം അങ്ങ് പാചകിച്ചു കളയാമെന്ന് കരുതി. ഫ്രിഡ്ജ് തുറന്നു. ഇന്നലെത്തെ നരക കോഴിയുടെ (ഗ്രില്ഡ് ചിക്കന് – തീയില് കറക്കി ചുടുന്ന കോഴി) ബാക്കി ഇരിക്കുന്നു. അതുവച്ചെന്താ ചെയ്യുക എന്നാലോചിച്ചു.ഇവിടത്തെ മലയാളി ഹോട്ടലുകളില് “ചില്ലി” എന്നും പറഞ്ഞ് ഒരു സാധനം കിട്ടും. അതുണ്ടാക്കുന്നത് കോഴി പുഴുങ്ങി അതിന്റെ മാംസം പിന്നിയിട്ട്, അത് ഇത്തിരി മസാലയൊക്കെയിട്ട്, അരിഞ്ഞ ഉള്ളിയും പച്ചമുളകുമിട്ട് വഴറ്റി വേവിച്ച് എടുത്താണ്. (ഇവിടെ യു.ഇ.ഈയില് മാത്രമേ ഞാനത് കണ്ടിട്ടുള്ളു. നമ്മുടെ ചൈനീസ് ചില്ലി ചിക്കനുമായി ഇതിന് പേരില് മാത്രമേ സാമ്യമുള്ളു.)
കോഴിയിറച്ചി പുഴുങ്ങി പിന്നുന്നതിനു പകരം വേവിച്ച കോഴി ഇരിക്കുകയല്ലേ? അതെടുത്ത് ചില്ലിയുണ്ടാക്കാമെ. ഏതായാലും ചോറിന്റെകൂടെ തിന്നാന് മുദീര് ഇന്നലെ വച്ച മീന് കറി ഇരിപ്പുണ്ട് . ചില്ലി ചീറ്റിയാലും സാരമില്ല.
സവാള ഗിരിഗിരി എന്നും പറഞ്ഞ് സവാളയൊക്കെ അരിഞ്ഞുകൂട്ടി പച്ചമുളകൊക്കെ അരിഞ്ഞ് നരകക്കോഴിയെ എടുത്ത് എല്ലൊക്കെ കളഞ്ഞ് വെന്ത മാംസം ഒരു പാത്രത്തില് പിന്നിയിട്ടു. സവാളയും ഉള്ളിയും ഒരു തവയില് എണ്ണയില് മൂപ്പിച്ചു കൂടെ ഇത്തിരി മോഹന്ലാലിന്റെ ചിക്കന് പൊടിയും ഇട്ട് ഇളക്കി, പിന്നിയ ചിക്കനും അതിലിട്ടിളക്കി കുറച്ച് സോയ സോസ്സും റ്റബാസ്കോ സോസുമൊക്കെ ഒഴിച്ച് സാധനം റെഡിയാക്കി.
മുദീര് വന്നു അത് ടെയ്സ്റ്റ് ചെയ്ത് നോക്കിയിട്ട് “കൊള്ളാമെടാ” (വേറെയൊന്നും ഇല്ലേല്!) എന്നു പറഞ്ഞിട്ട് പോയി.
അത് കേട്ടപ്പം ഇത്തിരി അഹങ്കാരം തോന്നി. എന്നിലെ ക്രിയേറ്റിവിറ്റി പെട്ടന്ന് ഉണര്ന്നു. ചൈനീസ് ചില്ലി ചിക്കന് കോണ്ഫ്ലൊറൊക്കെ കോട്ട് ചെയ്ത് പൊരിച്ച്, മര്യാദയ്ക്ക് ഞാന് പണ്ട് ഉണ്ടാക്കിയത് മനസ്സില് ധ്യാനിച്ച് അതിലെ ചില അംശങ്ങള് എന്റെ മുന്നിലിരിക്കുന്ന അറബി “ചില്ലി”യില് ഒന്ന് സംയോജിപ്പിച്ചാലോ എന്ന് ആലോചിച്ചു. ഒരു “അറബ്-ഓറിയെന്റല് ഫ്യൂഷന്” ആയാലെന്താ?!ഈ ചില്ലിയെ എടുത്ത് ഉണ്ടകളാക്കി കോണ്ഫ്ലോര്+മുട്ട മിക്സില് കോട്ട് ചെയ്ത് മീറ്റ്ബോള് സ്റ്റൈലില് ഫ്രൈ ചെയ്താലോ? ചിന്ത പോയി. മുദീറിനെയും രാജീവണ്ണനെയും ശശിയണ്ണനെയും ഒന്ന് ഞെട്ടിക്കാം. മുദീറിന്റെ വിചാരം മുദീറാണ് ഉം അല് കുവൈനിലെ ഏറ്റവും നല്ല പാചകക്കാരന് എന്നാ!
കോണ്ഫ്ലോര് വേണം. എവിടെ? “എടാ, അതാ തട്ടലമാരിയിലുള്ള ഡബ്ബയില് കാണും. നോക്ക്.” എന്നു മുദീര് ഉവാച.
ശരി. തട്ടലമാരിയില് നോക്കിയപ്പം 2-3 ഡബ്ബകളിരിക്കുന്നു.എല്ലാത്തിലും വെളുത്ത പൊടികള്. ഒരെണ്ണം തുറന്നു നോക്കി. മണത്തുനോക്കിയപ്പം കോണ്ഫ്ലോര് ആണെന്നു തോന്നി. കുറച്ച് എടുത്ത് പാത്രത്തിലിട്ടു. 2 മുട്ടയെടുത്ത് അതിന്റെ മേല് പൊട്ടിച്ചൊഴിച്ചു. ഇത്തിരി ചൂടുവെള്ളം ഒഴിച്ച് മിക്സിങ്ങ് തുടങ്ങി.എനിക്കൊരു സംശയം. കോണ്ഫ്ലോര് കുഴയുന്നതു പോലെയല്ലല്ലോ ഇത് കുഴയുന്നത്. എടുത്തത് കോണ്ഫ്ലോര് തന്നെയാണോ?
മുദീറിനെ വിളിക്കാം. “അണ്ണാ, ഇങ്ങോട്ടൊന്നു വന്നേ, ഇതിലേതു ഡബ്ബയിലാ കോണ്ഫ്ലോര്?”
“നീ ഏതു കോത്താഴത്തെ “ഹോട്ടലീയര്” ആടാ? നിനക്ക് കോണ്ഫ്ലോര് ഏതാണെന്നറിയില്ലേ?” അഭിമാനക്ഷതം! അകത്ത് കുപ്പികളുടെ കഴുത്ത് ഞെരിഞ്ഞമരുമ്പഴാ അടുക്കളയില് വരാന് സമയം! പോരാഞ്ഞ് എന്നെ കുറ്റവും പറഞ്ഞു. വേണ്ട, ആരുടെയും സഹായം വേണ്ട.
അടുത്ത ഡബ്ബ തുറന്നു. അതിന്റെ പൊടി കുറച്ചൂടെ വെള്ളക്കളറാ. ഇതു തന്നെ കോണ്ഫ്ലോര്. അപ്പം ആദ്യമെടുത്തത് എന്തായിരുന്നു? ആ പൊടിയെടുത്ത് സ്വല്പ്പം നാക്കില് വച്ചുനോക്കി. പാല്പ്പൊടി! സാരമില്ല. പാല്പ്പൊടി പാചകത്തിനുപയോഗിക്കും. ഐറിഷ് സ്റ്റുവൊക്കെ പാലും മട്ടനും വച്ചല്ലേ ഉണ്ടാക്കുന്നത്! ഒരു വറൈറ്റി ആയിക്കോട്ടെ! മിണ്ടണ്ട. രണ്ടാമത്തെ ഡബ്ബയിലിരുന്ന “കോണ്ഫ്ലോര്” എടുത്തു അതിലോട്ട് തട്ടി. കലക്കാന് തുടങ്ങി.
“എടാ, ആ നീല അടപ്പുള്ള ഡബ്ബയിലാ കോണ്ഫ്ലോര്”… അകത്തൂന്ന് മുദീര്.
ഞാനെടുത്ത ഡബ്ബകളുടെ അടപ്പ് നോക്കി-പച്ച, മഞ്ഞ! നീല ഞാന് തൊട്ടിട്ടില്ല ഇതുവരെ. ഈശ്വരാ…”അപ്പം മറ്റേ ഡബ്ബകളില് എന്താ മുദീറേ?”
“ആ പച്ച ഡബ്ബയില് പാല് പൌഡര്, മഞ്ഞ ഡബ്ബയില് തേങ്ങാ പൌഡര്”.
തൊലച്ചു. ഇങ്ങേര്ക്കിത് നേരത്തെ പറഞ്ഞുകൂടായിരുന്നോ? കുളമായി. ഇനിയിപ്പം എന്താ ചെയ്യുക?
“എന്താടാ, ഒന്നും മിണ്ടാത്തെ? കണ്ടോ?”
“ങ് ഹാ, കണ്ടു”.
“നീ ഉണ്ടാക്കി കഴിഞ്ഞില്ലേ? പെട്ടന്നാകട്ടെ”
“ശരി, ഇപ്പം റെഡിയാക്കാം”. ഇനി ഒറ്റ വഴിയേയുള്ളു. ഇവനെ ഐറിഷ് മട്ടന് സ്റ്റ്യു പോലെയാക്കിക്കളയാം. അത് കോണ്ടിനെന്റല് ഡിഷാ. അതെങ്ങിനെയാ ഉണ്ടാക്കുന്നത്? ആരോട് ചോദിക്കും? ഹോട്ടലിലെ ഷെഫ് ജയനെ വിളിക്കാം. ജയനെ വിളിച്ചു. ജയന് ഫോണ് ഓഫ് ചെയ്ത് വച്ചേക്കുകയാ-അതോ കിട്ടാത്തതോ? തോറ്റു പിന്മാറാന് പാടില്ല. വരുന്നത് വരട്ടെ. മുദീറും ബാച്ചും രണ്ടാമത്തെ റൌണ്ടും കഴിഞ്ഞിരിക്കും-ഈ സമയത്ത് എന്തുകൊണ്ട് വച്ചാലും അത് തീരും (“കുല്ലു ഇംഷി” എന്ന് അറബിയില് പറയും)
കുറച്ചൂടെ തേങ്ങാപ്പൊടിയും പാല്പ്പൊടിയും ഇട്ട് കലക്കി. വല്യ തവ ചൂടാക്കി നേരത്തെ ബാക്കിയിരുന്ന സവാളയും മുളകും എടുത്ത് വഴറ്റി അതിലോട്ട് “ചില്ലി”യാക്കി വച്ച ചിക്കന് എടുത്ത് തട്ടി. അതിന്റെ കൂടെ ഈ പാലുപോലിരിക്കുന്ന കലക്കിയ സാധനം എടുത്ത് ഒഴിച്ചു. വരുന്നതുപോലെ വരട്ടെ.
കറിപോലെ ഒരു സാധനം അടുപ്പില് കിടന്ന് വേവാന് തുടങ്ങി. എന്നാല് ഇതിനെ ഒന്ന് “തിക്ക്” (thick) ആക്കി കളയാം എന്നു കരുതി. കോണ്ഫ്ലോറിരിക്കുകയല്ലേ? കോണ്ഫ്ലോര് എടുത്ത് തട്ടി. ചക്ക എരിശ്ശേരി പോലെ അത് വെന്ത് തിളയ്ക്കാന് തുടങ്ങി. ഇളക്കി ഇളക്കി. അവസാനം അതൊരു കിണ്ണത്തപ്പം പരുവത്തില് ആയി.
ഇതിനൊരു പേരിടണമല്ലോ. കുളമായ ചിക്കന്! ചിന്തിച്ചു.”ചിക്കന് കൊളായി” അങ്ങനെ പിറന്നു.
വാല്ക്കഷണം: “ചിക്കന് കൊളായി” യെ അവതരിപ്പിച്ചത് ഒരു മെക്സിക്കന് ഡിഷാണെന്നും പറഞ്ഞാ. അവരത് കഴിച്ചു. ഇതിലെ കഥാപാത്രങ്ങളെ (ചിക്കന് കൊളായി ഒഴിച്ച്) ഇവിടെ കാണാം.
സംഭവം തട്ടിപ്പായിരുന്നെന്ന് ഇത് വായിക്കുമ്പോള് അവര്ക്ക് മനസ്സിലാകും. ഞാന് ഇത് പോസ്റ്റ് ചെയ്തിട്ട് അവരുടെ (തെറി) വിളി കാത്തിരിക്കുകയാണ്. മുദീറേ, രാജീവണ്ണാ, ശശിയണ്ണാ, എന്നോട് ക്ഷമി,ഒന്നും മനഃപൂര്വ്വമല്ലായിരുന്നു. ഏതൊരു പോലീസുകാരനും ഒരബദ്ധമൊക്കെ പറ്റും.
പുതിയ അഭിപ്രായങ്ങള്